Stèr dessema, semenza preziousa

Stèr dessema, semenza preziousa

Poesia

Stèr dessema,
semenza preziousa
che fèsc nascer condivijion,
na neva vijion:
tu no t’es soul
ogneun à si sgol
da viver, da fèr
da creèr e da mudèr .
Stèr dessema
l’é richeza
che se fèsc don,
l’é la semenza
che se fèsc magon.

Reflescion

Desche emprometù te mia rezenjion del liber L metodo daneis per viver contenc. Hygge – Hygge: The Danish Art of Happiness, voi jir ite più a fon te valgun element che caraterisea belapontin l’hygge.
La parola la vegn ca da la veia Norvegia, e volessa dir en generèl “stèr ben”: Hygge l’é donca na sensazion de confort, de relax e de serenità che se sent te n contest intim, privat: hygge l’é n fech empeà canche de fora l’é freit, l’é na sera anter amisc a jièr a chèrtes. Hygge l’é stèr ben da soi e anter la jent.

Donca per stèr ben l’é emportant poder stèr delvers, poder se palesèr per chel che se é, esser se enstesc, semper, e amò più emportant l’é poder viver chest tant con de autra persones, sperimentan donca ence l’acolienza e la spartijon. L’é emportant stèr dessema ai etres, spartir picoi moments te intimità con autra persones: se pel les envièr a cèsa, se per jir a les troèr.

“Hygge l’é creèr na sensazion de confort, de relax e de serenità che se sent te n contest intim” e per fèr chest, a outes bèsta dassen pech e te chela che se l spartesc con zachei, chest bonstèr l doenta amò più gran.

Ge peisse che sie dassen emportant coche se se sent canche se tol dant na persona o coche se la va a troèr. Ge peisse a tant hygge che se pel fèr tel jir ence demò a troèr na persona veia, la fajan sentir delvers e tolan sù sie valor; e coche sie emportanc i gropes: da chel de la familia, a chel de volontariat, a la sociazions: stèr dessema.
L bonstèr che ogneun pel arjonjer con n stil de vita fat de intimità, de calor e de acolienza, l se sparpagna canche l vegn spartì. A chest proposit scrive chiò sotite una de la testimonianzes che se troa tel liber:

“Canche vae a troèr valgugn, me tole dò café e crofegn e beleche semper scomenze col domanèr coche i stèsc. L’é fondamentèl che la vijita la ge vae dò al ritm e ai besegnes de la persona e l’é emportant esser bogn de scutèr. […]  Vae a troèr i veies ajache son de gra per ogne cossa che é ciapà te mia vita, donca peisse che sie bel reter vèlch. […] […] Hygg-èr e stèr ben coi etres, chesta l’é la vita. L te deida a mantegnir la ment viva. É perdù doi fies e mi om per na malatìa ereditara e ge vel temp per se n fèr na rejon, ma dò rua n moment olache no te pes più lascèr che l dolor te empienesce la giornèdes e, enveze, te sentes de cogner esser content per duc i bie moments che passé ensema. Cree che co na ment ascorta e mingol hygge duc i dis, se posse viver delvers cheche mai sozede te la vita”.

E per te che che él stèr dessema? L viveste desche na semenza preziousa? Can este bon con te e/o con l’auter, duc doi zenza tema de esser se enstesc?

Mostra 2 commenti
  • Franca
    Rispondi

    Beliscim Alberta l conzet de hygge: l’é chel che i buddisti ge disc “Kosen rufu”, esser contenc te chesta vita fajan l ben per i autres. Chest porta la vera legreza che l buddism chiama “fragranza” tel cher. 🤗

    • Alberta Rossi
      Rispondi

      Telpai de to riflescion Franca!”Fragranza” tel cher l’é na beliscim a esprescion. Pense che duc daite sention che canche fajon zeche per o ensema ai autres, l ciapa n auter saor. La roba fondamentala l’é la far col cher, zenza se spetar zeche o perché se “cogn l far”. :0)