DeTelpai che vegn dal cher

Poejia

DeTelpai che vegn dal cher
per ladin Tel die sinzier
a Ti che te me ès vidà,
a Ti che te me ès didà
a Ti che te te ès fidà,
a Ti che te me ès sostegnù
a Ti che te me ès vedù,
a Ti che te ès cardù
te chest mie ensomech
che vegn dal cher:
mie deTelpai: l più sinzier!

Reflescion

En sabeda ai 29 de jugn, la dì de Sèn Piere e Paul, prejentaré mie liber Misteres, aventures e magica creatures – La val de Fascia anter fantasìa e realtà.
Son emozionèda e contenta! Te mie paìsc, l dì de la sagra, prejentaré mie liber dut per fascian. É cernù de scriver vigni contìa tel ladin del paìsc olache la contìa la se dejouc e donca se podarà lejer la contìes per moenat, per brach, per cazet e ence te la “variantes de mez” da Mazin, da Ciampestrin e da Fontanac. La pèrts generiches enveze les é per fascian standard: chest perché é volù ge dèr valor tant a la variantes de val che al fascian standard.
L’é stat n gran lurier che me à dat na gran sodisfazions, soraldut percheche l’é doventà n lurier de grop: chiò sotite podede lejer la piata di rengraziamenc che é metù tel liber olache ge sporje mie gran deTelpai a duc chi me à didà!

Rengraziamenc

Canche é tacà a scriver chest liber volee me oujer soraldut ai più pìcoi e a chi che à a cher l’ambient e l melaur de vigni cultura e con ic volee descorir mìngol più davejin Fascia e duta so richeza.
Coscita é scomenzà a scriver la contìes per ladin, mie lengaz mare, e é tacà da junsom la val e son vegnuda en su. Canche son ruèda sa Vich, aee de besegn de saer se la contìes, coche les aee pissèdes, les aessa podù piajer.
La persona che me à encoragià e che me à engaissà a jir inant me dijan che l vièl che aee ciapà l’era chel giust, l’é stat Bruna Maria Dal Lago Veneri – scritora de nonzech e persona de gran cher – e chi che me à dat l met de publichèr l liber l’é stat l’editor Paolo Curcu de la Curcu Genovese da Trent, che l’à volù l dèr fora per talian e ades ence per ladin. A ic doi ge sporje n gran deVelpai!
La edizion per ladin la é vegnuda fora ence de gra a l’enteress del Sorastant de la Scola Ladina de Fascia, Mirella Florian, che jà dal scomenz la la volea te scola tant per i bec che per i insegnanc. N gran deTelpai ence a ela!
La pruma edizion per talian dò nience ot meis la era jà fenida e l gran enteress che l’à soscedà l me à dat la gaissa per seghitèr a scriver e vegnir fora ence con chesta edizion. Donca n gran deTelpai a duc i letores, a sie paroles e a si consees!
Chest lurier per ladin l’é stata dassèn particolèr e l me à portà a me sproèr te la desferenta variantes de val: é abù l met de vegnir a saer e de emparèr ence vèlch rejonèda da zacan e de tirèr ca paroles che no sentìe più, e per chest é volù jontèr junsom al liber n pìcol dizionèr co la paroles o la rejonèdes più curiouses.
De chest vers tropa persones da desvalives paìjes de la val à let mia contìes me didan te chest lurier, che coscita l’é doventà n lurier de grop: Maura Chiocchetti, Roberta Dellantonio, Maria Piccolin, mia mère Giuliana Zulian, mia sores Lorenza, Manuela e Cristina Rossi, Fernando Brunel, Marco Weiss, Monica Cigolla, Fulvio Vian, Nicola Detomas, Floriano Bernard, Luciano Costazzer, Maria Teresa Valentini, Livio Maria Bernard, Nicoletta Dallago, Anelise Vian, Stefano Riz, Raffaele Rizzi, Daniele Verra, Valentina Redolfi, Lodovica Dioli e Nadia Valeruz.
Amò apede con Donatella Dellagiacoma é emparà trop su l’èrt de la traduzion, e de gra a ela, a Nives Iori e a Evelyn Bortolotti l ladin é stat rencurà tel detai. Tinùltima Nadia Chiocchetti à vardà fora con gran amor e atenzion la proes de stampa.
A vigni persona che me à didà e sostegnù: n gran detelpai de cher! E soraldut n gran deVelpai ence a mia mère e a mie père che me à tramanà l respet e l’amor per mie marelenga, l ladin.

En sabeda ai 29 de jugn

En sabeda prejentaré l frut de chest bel lurier e donca amò n gran deVelpai a l’Union di Ladins de Fascia per me aer didà a endrezèr la prejentazion, al Comun de Soraga per aer metù a la leta la sala e n gran gran deTelpai al Grop Marìjene – Pìcoi da Mont per me aer didà a portèr dant n pìcol spetacol da grignèr ispirà a mie liber.
N deTelpai particolèr a Silvia Dellantonio e a Lisa Brunel per me aer didà co l’ideazion e a l meter jù. En ùltima amò n deTelpai al grop di Bontemponi da Poza per ne aer dat na man!

DeVelpai a duc! Ve spete en sabeda!