Este coerent? Tu es dut, l rest é abeliment

Poesia

La coerenza
l’é n’union de
armonìa e costanza
de fe e leam
anter sé e chel che se fèsc
anter l’anché e l doman
anter l dir e l fèr
anter l’esser e l testimonièr.
Este coerent?
Tu es dut,
l rest é abeliment

Reflescion

L’é da mìngol che volee scriver n artìcol su la coerenza. L’etimologìa de la parola coerenza la vegn cà dal latin cohaerere  (a sia outa, da co- =  insieme + haerere = esser tacà). Donca  coerenza é sinonim de vèlch da tegnic e so segnificat se referesc a na calità comportamentèla, etica, enscinamai morala, che vel dir costanza, armonìa, corespondenza.

La persona coerenta

La coerenza é na calità, na vertù che te la sozietà d’aldidanché somea che la sie jita mìngol dò brea jù. Purampò, se mencia coerenza anter chel che na persona disc e chel che la fèsc, anter chel che la peissa e chel che la met en pratega, anter chel che la é e chel che la palesa, l’é desche se, a valch vida, la persona no la sie en esser en dut e per dut.

L valor de la coerenza

La coerenza é n valor fondamentèl, soraldut te l’educazion di fies, ma ence te l’esser de ejempie ai etres, soraldut ai più joegn. E a la dir duta, l’é n valor per la persona enstessa, ajache sentir armonìa anter chel che se é e chel che se fèsc, porta gran serenità e gran forza.
No l’é semper sorì esser coerenc, ma a outes bastassa dassen demò se fermèr n moment, se vardèr daìte, se scutèr e dezider chi che se vel esser.
Per chest Nadèl l’augurie più bel che fae a vigni persona l’é de troèr se enstessa e sia armonìa, e de la viver con serenità. E tu che peisseste de che sta parola? Coerenza?

Bon Nadèl!