L metodo daneis per viver contenc. Hygge. – Il metodo danese per vivere felici. Hygge.

de Maria Tourell Søderberg – Editor Newton Compton.

Poejìa

L metodo
per viver contenc
fèsc rima con chel che ti es,
chel che te peisses
e con chel che te fès.
La contenteza
defat l’é costion
de coche se la veit,
de percezion,
de idees
e ence de concezion.
Ben segur!
Ajache la contenteza
la é desferenta
a seconda de chi che sion,
che che vedon,
coche vivon.
E soraldut se la volon!

Reflescion

Anché voi rejonèr de chest liber, che à abù gran suzess te l’Inghiltera, e che me à piajù n muie.
L rejona de la contenteza e de co che, tras pìcola cosses, se pel la viver duc i dis. I daneisc, aldò del Raport Mondièl de la Contenteza fat ogni an da l’Onu, da passa caranta egn l’é l popul più content del mond. Si secret l’é te na parola: hygge. L’é na parola che se fèsc fadìa a traslatèr ma che volessa dir intimità, calor, stèr delvers coi etres. L’é la capazità de fèr a na vida de troèr a cèsa n ambient che deide a stèr polito chi che ge stèsc laìte.

Consees

«Consees scempies e percacenc, desche empeèr na ciandeila, cojinèr ensema, fornir sù la cèsa, destudèr i fonins e se mateèr ensema, se contèr coche la é jita, e esser dassen te chel moment e te chel lech. La maniera più scempia per viver l’hygge te noscia vita l’é esser contenc co la persones che aon più apede» coscita disc l’autora.

E per te?

E per te? Che él pa “hygge”? Scriveme che che te peisses. Ti post che vegn, jiré più a fon ti aspec che caraterisea chesta maniera de viver e de esser. Te salude con na frasa de Tove Ditlevsen, scritora e poeta daneisa:

“L’hygge l’é na maniera de esser che se vif canche se é en pèsc con se enstesc, col compagn de vita, col corp e co la tasses”.

Bondì alternatif a duc e bon hygge!