La lum, encanteisem che condusc

Poesia

La lum,
la couc, la produsc
la mena desche n fusc
l’eie, l spirit
desche n encanteisem
dut muta,
te l’acort
de la pèsc
desche cometes
sie raes
se fèsc paesajes,
mirages, messajes
che coer te pes.

Reflescion

Te chest articol voi jir ite te n aspet che me à encuriosì endèna che lejee l liber L metodo daneis per viver contenc: Hygge de Maria Tourell Søderberg de l’editor Newton Compton, de chel che é fat la rezenjion te un de mie ultimes articoi.

En particolèr voi me fermèr sun n element a chel che i daneisc i ge dèsc na gran emportanza per creèr chel bonstèr che ic ge à dat inom belapontin “hygge”.

Anter la tanta cosses che ic rencura per creèr intimità te cèsa, apede che la piantes, l’aredament, la cosses che i tegn te cèsa, i libres che i lec e la musega che i scouta, n post spezièl la lo à la lum.

La lum

Se cogn dir che te l’emisfer boreal per sie-ot meisc a l’an i daneisc i cogn depener da la lum artifizièla ence via per l dì. Per chesta rejon la sort de lum che i à te cèsa e ence sul post de lurier la é n muie emportanta. Soraldut, disc ic, ge vel che la lum no bate dret ti eies e che sie possibol la uzèr o sbassèr aldò de coche se la dora. En particolèr, i daneisc à na pascion soraldut per una sort de lum: chela de la ciandeiles.

La lum de la ciandeila

Na roba scempia, de etres tempes fosc, ma che ence ge dore da spes e che, con sia lum delicata, fèsc dut più intim e “hygge”. Che sie magnèr vèlch, lejer n bel liber, scutèr musega o ence beiver n tè sot na cuerta ciauda, se se l fèsc co la lum de la ciandeila, la doventa più intima e bela.
A chest proposit scrive chiò doi toc che vegn fora dal liber e che palesa delvers la semplizità, ma ence l poder de na ciandeila.

Na roba sé de segur: l’é doi robe che i daneisc no pel fèr condemanco, l papier da cesso e la ciandeiles. Per fortuna, duc doi se i troa ence te la boteighes più picole.
Roger Beale, sentadin ingleis en Daniamarca, per l sfoi «Politiken».

Canche vegne de retorn a cèsa dò na giornèda de lurier, la pruma cossa che fae l’é empeèr na ciandeila. Chest me deida a enter che l’é ora che me sente jù e che me mete sorì. Ence canche viaje me tole semper dò vèlch ciandeila, coscì son segura de poder me conzeder n moment hyggelig olache mai son.
Tilde Vengsgaard, Randers

Na ciandeila la costa pech, ma la pel voler dir n muie e no demò tel raport co sé enstesc o con chi che stèsc co nos, ma ence coi etres. Ence na orazion dita sù per valgugn tel chiet endèna che se empea sù na ciandeila, ciapa n segnificat più intim.

E tu che en peisseste de la lum? e/o soraldut de chela de la ciandeila?