La natura: respet e cultura

Poesia

La Natura
la é maraveousa
preziousa e misteriousa.
L Creat l l’à fata
l’om e autra creatures
aló i se à enciasà.
Vardon de la defener e
de la rencurèr:
demò respet e cultura
fajarà viver ben
noscia Natura.

Reflescion

Da dotrei setemènes en ca te dut l mond se sent rejonèr de na tousa de 16 egn. Se trata de Greta Thunberg, ativista svedeisa che la se à arvejinà a la Natura, la l’à osservèda e l’à tout na dezijion che l’à palesà a na vida forta.

Da chela dezijion l’é vegnù fora n moviment che à enteressà tousc de dut l mond: #fridayforfuture l’é stat n fenomen che à abù gran ejit.

Natura, respet e cultura

En cont de la reflescions e de la scomenzadives de chesta joena svedeisa se podessa dir n muie, ma chel che chiò voi meter al luster l’é chest: duc chisc tousc che à spartì l pensier de Greta che volei avisa? Che ge dijei pa a na vida scì zaca ai gregn?

Segur no i domana de renunzièr al progress e a sie vantajes ma de segur i domana de poder viver la Natura a na vida desferenta: più naturèla, più scempia, più sana. L respet, la rejon e l sentir é struments che se prateghé da duc pel soscedèr dassen n mudament mondièl.

#fridayforfuture

#fridayforfuture é stat n segnèl, n moviment, na touta de posizion emportanta che ge à fat capir a dut l mond tant che i tousc de anchecondì i sie madures e soraldut responsaboi de sia vita. Duc sion chiamé a respetèr nosc ambient e a se sentir responsaboi. La Natura che aon dintorn no l’aon fata nos, l’é n don che aon ciapà: vardon de se l recordèr.

E tu che fèste pa per viver con respet la Natura? Descheche à dit Greta te sie descors al Cop 24 de Katowice tel 2018 ”no te es mai massa jon per fèr la desferenza”.

Ge volesse slarièr mìngol chest conzet e per chest traslate chiò na frasa del Dalai Lama: “Se te peisses de esser massa picol per fèr la desferenza, proa a dormir con n moscolon”.

#BondìAlternatif e bona domenia!