L’energìa del bosch e de la Natura

Poesia

 

L’energìa del bosch
e de la Natura
l’é n don che no fenesc mai
che se slèria fora
te la magìa
de sia Energìa.

La me rua
desche melaur
e te si gremen
troe endò me enstessa
e chel esser lijiera
che dèsc vita al levà.

 

Reflescion – La boraschèda Vaia e nesc bosć

Acà n an, te la net anter l 28 e i 29 de otober, na boraschèda teribola à tocià la Tèlia sun dut l Trivenet mudan per semper l paesaje de la Dolomites e desfeguran beleche 20 mile etares de bosć demò tel Trentin. Dò n an volesse fèr na curta reflescion su l’emportanza de nesc bosć e su la Natura en generèl.

Ti secoi l’om l’é passà dal viver la Natura desche vèlch da chel che l cognea se defener o adorèr, enscin a ruèr aldìdanché olache enveze la pèr vegnir conscidrèda soraldut material mort da durèr e desfrutèr coche se vel. Se à perdù l contat reèl co la Natura, se vif per la maor pèrt del temp daìte da usc e da spes se à desche l’imprescion che sie vèlch da dalonc o aboncont che no à che veder co l’om.

Aon besegn de la Natura

Sessaben che enveze aon de besegn de Ela, no podon viver zenza. Tropa persones enten chest besegn, zenza entener dalbon la rejon?
La natura ne sporc magnadiva, alberch, beleza, ossigen… ma che el che ne spenc a jir te n bosch? Perché pa canche aon besegn de stèr per nosc cont, de se tirèr sù, canche aon de besegn de pissèr sora a zeche, de stèr te l’acort, de se vardèr da ite o ence demò de serèr i eies e no pissèr, jon te n bosch e no zaolà utró?
Cree che na parola che palese delvers chest besen no la sie, ma zenza dubie l’à a che fèr co l’energìa, apontin l’energia del bosch. Albert Einstein dijea: “Dut é energìa” e chela del bosch l’é zenz’auter una de la più autes.

L’Energia

L bosch l’à n’energìa particolèra e l bosch de la Dolomites l n’à una dassen straordenèra. L’é n bosch che à na gran storia e n’ènema veiora, che à vivù tenc evenc, che à cognosciù la veres… l’é n bosch che à padì, e descheche scrif l scritor Paulo Coehlo “Chi che à padì l’é desche chi che cognosc desvalives lengac. L’à emparà a entener duc e a se fèr entener da duc”.
E defat canche son con el me sente a cèsa, me sente entenuda, me sente azetèda e amèda per chela che son e per chest ge son de grà ogne outa che posse l viver, ogne outa che ge passe apede o che l veide.

“L’é dut nia”

Dò la boraschèda Vaia, canche é vedù mie bosć ferii, é sentù n dolor fon ma ence n gran sentiment de recognoscenza. I se aea sacrificà e i ne aea stravardà, duc. E amò n’outa i me à passà n messaje lijier, no de dolor ma de speranza: “L’é dut nia” someèa che i me die, n envit a viver a na vida più lijiera ma ence destachèda la vita, e a passèr via la dificoltèdes, descheche à fat ic.

A la Natura, a sie bosć, a nesc bosć amò Develpai.

E tu che troeste canche te vès tel bosch? Senteste ence tu chesta energìa particolèra? Bondì alternatif a duc.

FOTO EDDY BUCCI –  EDDYBUCCI.COM