Om Umol, Om Gran
Poejia
Om umol, Om gran,
che tu es passà anter de noi
recordene semper
l valor de la cultura
che te la condivijion
se fasc melaur
che per semper dura.Om umol, Om gran,
pare de ciasa
e de comunanza
tu te as semper dat jù
con pascion e dedizion,
lum per noi che chieriane
nosce reisc fasciane.Te to longia vita
la musega à dat ousc
a to più bie sentimenc,
piegn de devozion
per Sènt’Ulgiana,
de Fascia noscia patrona,
a ela jìa to fe più fona.Deidene ades cajù
che n gran besegn aon
de Omegn desche tu,
dai pensieres lijieres
da parole de contegnù
de fac che desmostre
che la Vita l’é Valch de più.
Riflescion
Chesta setemana de pascion, l’é se n jit sun paradis n Om che tropes te Fascia cognosc per dut chel che l’à fat per la comunanza, ma che tropes, soraldut i più joegn, no sa chi che l’é ajache l’era oramai de età. Gio enveze é abù la fortuna de l cognoscer mìngol più da vejin propio tel fenir de so vita e voi l recordar a na vida scempia, ajache el l’era n Om umol, ma con n’anima grana.
Chel che l’à fat te so vita l’é stat dit e scrit chisc dis: en curt recorde che l’à dedicà gran part de so vita per l ben comun, l’é stat l’ombolt più joen de duta la Talia, l’à lurà al lonch ti ofizies del Comun da Vich e de chel da Soraga se fajan voler ben semper da duc. L’é stata ciantor de gejia sa Vich egn alalongia (ge piajea recordar che l’aea emparà a ciantar e sonar da zeche ebrei che stajeva sun Tamion endana la vera)…
Amò apede, Carleto l’aea na fe fona che l testimoniaa no demò col se dar jù per i autres, ma ence rencuran la gejia de Sènt’Ulgiana, na sènta per chela che l’aea na gran devozion.
Carleto aea na gran cultura de la storia de noscia val e ge saea bel la meter a la leta de chi che aea enteress e volea la cognoscer.
Ence ti ultimes egn bastaa ge nominar Pare Frumenzio o Sènt’Ulgiana e so elges i se enlumeaa dal content e da la comozion.
Canche de jené jìe a ge portar l calandar ladin l lejea i tesć con enteress e creise che chel che a el ge saee più bel, sie stat veder che vegnìa dò generazion che ge volea ben a nosc lengaz e a noscia cultura… e semper l me grignaa content.
Creise che sie emportan recordar e contar de persone desche el, ajache anchecondì, aon semper più de besegn de omegn e femene che dae ejempies desche chisc. Telpai Carleto.
